انت محرمتش

أية تذاكر السينما دي؟ أنت رحت السينما أمتى؟

أممم الأسبوع ال فات تقريبا

آه الأسبوع ال فات 

 رحت انا وصديقى مش مع واحده ست متقلقيش

هو أنا قلتلك انك رحت مع واحده ست

أنا بتكلم عن المبدأ هو أنت لية بتعمل كده 

بعمل اية؟

تروح الاكوا بارك وجسمك يقشر وأقعد أدهنهولك مراهم ومرطبات وتكدب عليا وتقولى نزلت عمت في نهر النيل في قريتنا ال في البلد وتسافر الفيوم ومتعرفنيش وتدخل سينما 3D  ومتقوليش وتخرج تتغدى انت وأصحابك ومتعرفنيش  وأهو رحت السينما وبردو معرفتنيش هو أنت  بتفكر إزاي؟

مبرداش اقولك علشان متزعليش؟

أنت مفكرنى انى هزعل لما أنت تروح الاماكن دي ليه؟

لإنك ببساطة مش بتكونى معايا ومينفعش أخدك معايا وقتها 

 للاسف عمرك ما هتفهمنى ولا هتفهمنى أبدا أنا بزعل يا أستاذ لانك بتروح ومبتعرفنيش  وكمان بتكدب وفعلا مفيش داعى للف والدوران ده كله مش لانك بتروح للاسف انت محرمتش من اكاذيبك ال كل شوية بتنفضح قدامي كل شويا بردو بتكدب أنت اية الكدب ده في دمك فيها اية لو شاركتنى حياتك فيها اية لو تحكيلى اية ال بيحصل في يومك زى ما انا بحكيلك وانت غالبا بتكون مش مركز ومش مهتم بس بردو بعرفك أنت لية كده؟ 

على فكرة مكنش في وقت احكيلك ال حصل الكلام ده كله كان من حوالى 4 ايام وlجتش فرصة احكيلك 
آه فعلا مجتش فرصة تحكيلي والله مبقتش فاهمة السبب اية انك متخيل انى هزعل انك رحت من غيرى او مكنش في وقت تحكيلى سبحان الله او لانك بتطق في دماغك وتروح فجأة
اقعدى بقى اعمليلى محاكمه 

لا محاكمة ولا حاجة انت فعلا مش فاهم اية ال مضايقنى ومش هتفهمنى أبدا  لو فاهم كنت هتعرف انى ببقى مبسوطة لما بتكون مبسوط ومعنديش اى مشكلة انك تخرج وتنبسط مع زمايلك لكن الفكرة انى مش لاقية داعي للكدب لا انا بحاسبك ولا بقولك لا مترحش ولا اقعد جنبي ومتخرجش ولا اى حاجة من الحاجات دي مش لقيالك مبرر

أصلها والله كلها بتبقى خروجات صدفة ببقى قاعد في الشغل وتطق في دماغنا أنا واصحابي وتلاقينا فجأة نقول  يلا نروح سينما يلا نتفسح يلا ناكل برة

طيب اية المشكلة انك تكلمنى وانت رايح المكان ده تعرفي طيب هل انا لو عملت نفس الموقف ده انت ترضاها لنفسك

لا طبعا؟

 امال لية انت بتعمل كده

أنتى مكبرة الموضوع اوى كده لية؟

يعنى ينفع انا اخرج واقولك رايحه اشترى حاجة وتتصل عليا اقولك معلش قابلت واحدة صحبتى وطقت في دماغى انا وهيا نروح مول او سينما أو ناكل بره  وروحنا 

لا طبعا انتى بتستعبطي
لية؟ علشان بردو نفس المشكلة انت الراجل وانا الست صح
قفلى بقى على حواراتك وشعاراتك دي انا زهقت من تفكيرك يا بتاعه قضايا المرأة

أنك كنت تكذب

لن يهمنى الآن هل أحببتنى بصدق أم لا ما يهمنى هو ما اكتشفته مؤخرًا بل مؤخرا جدا وهو أنك كنت تكذب على ومازلت تكذب،  ومن يكذب على من أحبته بصدق فمن الممكن أن يكون كاذبًا حتى في مشاعره وأحاسيسه.

هل تعتقد أنني سأنسى ما فعلته أو هتغاضى عنه كما تغاضيته ثانيا وثالثا ورابعا وخامسا لو سمحت أرحل ولا تبرر لي أي شيء وان لم ترحل سأرحل أنا عن عالمك بأكمله لن تحاول مجددا أن تبدأ من جديد معي فسبق أن بدأنا كثيرا من جديد وكان بسبب كذبة من كذباته فلا تستعطفني ولا تتقاسم معي مشاعرك الكاذبة المخادعه جفف دموعه الكاذبة وأكمل حياتك بدون خداعي

عمرك ما في يوم حسيتنى بقلبك

عارف المشكلة عندك في اية؟

اية بقى ان شاء الله؟

انك ديما بتكلمنى بعقلك وبردو بتحسنى بعقلك عمرك ما في يوم حسيتنى بقلبك ولا سمعتنى بروحك

لا والله امال انا بعمل ايه يا ست هانم يا بتاعه الاحاسيس؟ 

ما هى طريقتك دي خير دليل على ال بقوله 

انتى ناوية تعصبينى وخلاص والله قفلتينى وخنقتيني وانا اصلا مش طايق نفسي خلقه

عموما بجد انا تعبت انى اغير فيك وربنا وحده هو ال عالم هفضل مستحملة لحد امتى انا نفسيا تعبت تعبت بجد

يعنى اية عايزة تتطلقي طيب غورى في ستين داهية الباب يفوت جمل

ومن جاب سيرة الطلاق دلوقتى ؟

انتى يا ست هانم انتى مفكرانى مختوم على قفايا

شفت انت بتحور الكلام ازاى وبتفهمه غلط ازاى 

لا انا فاهمك صح

ما هي المشكلة انك ديما مش بتحاول تفهمنى بقلبك وديما بتتكهن وتتخيل وتعيش تخيلاتك ربنا يهديك

انتى شيفانى كافر

لا يا سيدي لا كافر ولا حاجة  وعموما ربنا يهدينى ويهدى جميع الناس وبلاش انت علشان بتتعصب من الكلمة هديت

لا يا سيتى مهدتش
نفسي أعرف أنت هتفضل لحد امتى   مبتسمعش إلا ال انت عايز تسمعه؟  أنت لية  متوقع ديما وشاكك اني عايزة أؤذيك أو نفسي أشوفك قاعد  يا عينى تؤنب ضميرك على اذيتي، على فكرة انت عمرك ما شفت الحقيقة في كلامي انت بس  بتظن أن الحقيقة ال انت فهمتها بس.. عارف على الاقل لو بصيت في عيونى مرة بس بقلبك هتعرف انك كسرتنى بدل المرة مليون مرة بسبب سوء فهمك وظنك.